Press Release
January 29, 2018

Ang rehiyonal nga buhatan sa DILG og POPCOM dinhi sa Rehiyon 10 nagkahiusa alang sa hugot nga pagpatuman sa Responsible Parenthood and Reproductifve Health Act o ang giila nga RPRH Law.

Dili pa lang dugay, o kaniadtong Enero 23, 2018 nahuman ang ikatulo o kataposang hugno sa pagpahibalo ngadto sa tanan nga mga Local Government Operations Officer dinhi sa rehiyon kalabot sa mga katuyoan og mga pamaagi nga nalatid diha sa DILG Memorandum Circular No. 2017-85 nga nagmando sa tanang mga regional director sa DILG, mga gobernador, mga mayor sa siyudad og lungsod sa pagseguro nga napatuman gayod ang programa ubos sa Responsible Parenthood and Reproductive Health Law, kansa kabahin na niini ang family planning.

Subay niini, giduso sa mga mitambong nga mga Local Government Operations Officer ang pamaagi nga ang mga mayor sa lungsod og sa siyudad, apil na ang mga gobernador sa mga probinsya mopakanaog og usa ka executive order alang sa katukoran sa Municipal/City/Provincial Implementation Team on RPRH Law.

Nasayran nga angayan gayod nga mapatuman ang katuyoan sa DILG Memorandum Circular No. 2017-085 tungod kay nahimo namang kabahin sa mga sumbanan diha sa pagpasidungog sa mga lokal nga panggamhanan ubos sa seal of good local governance ang mga nahimo niini diha sa pagpadangat sa serbisyo agi og tubag sa mga panginahanglan sa mga magtiayon o mga kababayen-an alang sa mga modernong pamaagi sa family planning.
—VIRGILITA L. SANDOVAL