Press Release
June 22, 2020

Ang mga lokal nga pangagamhanan, labi na ang mga barangay, giawhag ni Undersecretary Juan Antonio Perez III,Executive Director sa Commission on Population and Development (POPCOM) sa pagsiguro sa kaluwasan, kahimsog, ug proteksyon sa mga tigulang sa panahon sa COVID-19 pandemic.

Gitumbok sa POPCOM nga ang mga senior citizens nga nagpuyo nga nag-inusara doble nga nameligro kung walay sagad nga suporta gikan sa ilang suod nga banay.

Ang datos sa COVID-19 nagpakita nga ang mga tigulang ang pinakadali matakdan tungod sa ilang biklonon nga panglawas busa gidili sa ila ang paggawas sa ilang panimalay.

Basi sa labing bag-ong sensus sa populasyon sa tuig 2015, adunay 182,005 nga mga tigulang nga nag-edad 65 katuig pataas nga nagpuyo nga nag-inusara sa rehiyon 10. Sa  “Demographic Vulnerability Tool (DVT)” nga gipresentar sa POPCOM-X, adunay 78,153 ka mga tigulang nga nagpuyo nga nag-inusara ug nagpuyo sa balay nga aduna lama’y 20 metro kwadrado o mas gamay pa.  

Kini sila nga bahin sa populasyon maoy pinaka-apektado tungod kay walay pamilya nga gasuporta kanila.  Ang papel sa gobyerno nga manalipod ug magsiguro sa kaayo hansa mga tigulang nga nagpuyo nga nag-inusara mas nahimong lisud hilabi na nga nagpadayon pagsaka ang mga kaso sa COVID-19. Tungod niini, ang mga lider sa barangay kinahanglan nga makabalo kung kinsa ug asa kini sila makita aron mahatagan sila sa angay nga suporta.

“Kung wala ang ilang pamilya nga muatiman kanila, ang gobyerno kinahanglang aktibo sa pagpahimo ug mga mekanismo aron maatiman ug mahatagan sila ug kaayohan sa panahon sa krisis,” matud ni Dr. Perez.

Busa mahinungdanon kaayo alang sa mga LGUs nga aduna silay tagsa-tagsa nga mga database sa ilang populasyon aron mas tukma ang interbensyon nga mahatag sa mga nameligro nga sektor sama sa senior citizens hilabi na kadtong mga nag inusara pagpuyo. Giawhag ni Dr. Perez ang mga barangay nga magbaton ug rehistro sa mga panimalay, labi na sa nagpadayon nga krisis sa kahimsog. 

“Angay na gyod ang gobyerno maghimo’g mga mas lapad nga palisiya nga nagalangkob sa mga barangay aron sa pagsiguro sa kahimsog ug proteksyon sa mga senior citizens kinsa labing namiligro nga sektor sa populasyon, pinaagi sa mga ”long-term care policy interventions,”dugang pa ni Usec Perez sa POPCOM.